مناقشات واراء عن المدارس

اقتباس :

انجى

انا مش بحب اتدخل اوي في موضوع المدارس لان كل واحد عقله مريحه
بس شوفي هقوللك تجربتي
انا كان ليا بنتين جيراني من الطفوله و ايام ما دخلونا المدارس بابايا كان مصر انه يدخلني انجليزي زي اخويا و باباهم قال لا انا هدخلهم خاص عربي
طبعا الى يومنا هذا فرق شاسع في اللغه و النطق بيني و بينهم
رغم انهم الاتنين سافروا عاشوا في امريكا بس انسي و خدوا كورسات بالهبل وواحده منهم دخلت كليه انجليزي بيفهموا على الورق بس انما استخدام اللغه مبيعرفوش
دا غير اني مره انا وواحده فيهم اول ما اتخرجنا رحنا قدمنا في شغل و رغم ان تقديرها احسن مني الا اني اتقبلت وهي لا عشان انا خريجه مدرسه انجليزي و هي عربي
فانت فكري انك ممكن تتعبي شويه بس بتشتري لابنك مستقبله و مادام في كل الاحوال العليم زي الزفت يبقى احنا بنحاول نوجد لهم فرصه احسن مش ناخرهم فرصه و بعدين ابنك لما هيكبر هيقوللك ظلمتيني و فوتي عليا فرص كتير في بلد عقيم اهم حاجه فيه المظهريه و كنت مدرسه ايه و لابس ازاي

اقتباس :

رانيا اسبانيش

بقالي فتره كل ما افتكر اكتبلك علي حكايه المدارس اتشغل
انا مع انك تدخليه لغات جداااا
مادام عندك انتي القدره الماديه و انتي بتعرفي انجليش يبقي خلاص هتقدري تتابعيه
و الماث و الساينس مطلوبين في كل الكليات العمليه
و لو حتي هتقولي انك مش عايزاه يدخل كليه عمليه
يبقي برضه اديته لغه من صغره
و انا بصراحه متاكده من ان اللي بيتلعم من صغره علي النطق بيكون غير اللي اتعلم علي كبر و اخد كورسات
هيكون ايوه بيعرف انجايزي لكن مخه متبرمج عربي
الاستاذا الياباني بتاعي هناك قاللي كده انه مشكلته انه بيفكر بالياباني و مطلوب منه انه يتكلم انجليزي و يكتب برضه فاهماني
الللغات مش صعبه و لا حاجه لان الطفل من سن صغير اوي هيتعود عليها و دمتم
و انتي بتتابعي معاه
توكلي عهلي الله علشان ميقوليكيش بعد كده ضيعتي عليا فرص كتير
بس الحمد لله قلت اللي في نفسي
سلام

انجى

لما الطفل بيتعود على اللغات من صغره مبيفرقش بقى معاه العلوم و الحساب بالعكس دا بيوصل لمرحله انه مش بيقدر يتعامل غير بالانجليزي
و بعدين يوسف بريطاني اينعم بس برده هيبدا بعد الحضانه ياخد كل المواد عادي خاالص
طب انا اهو من 30 سنه دخلت مدارس انجليزي و كان بيدينا اجانب لان مدرستي كانت من اوائل المدارس في الجمهوريه للغات (كليه فيكتوريا)
و مامتي مكانش ليها في الانجليزي اوي
بس عاادي مجرد ما اتعودت كان طبيعي زي اسمي كدا
فانا بس بطلب منك انت و مادو متفكروش تحت رجليكم
فكروا للمستقبل و لبكره
انتوا بتشتروا لولادكم فرصه زياده و طالما فعلا في امكانيه ماديه يبقى حرااااام تحرموهم فرصه احسن
ماشي هتتعبوا بس هما اول سنتين بس و بعد كدا الولاد بتاخد على الانجليزي
طب هقولكم في مدرسات بييجوا بالشهر بيمسكوا المواد كلها بمبلغ مش كبير اوي
ممكن يشيلوا عنكم الصعب
معلش انا عارفه اني غلسه بس عشان انا جربت الفرق الفظييييع بين معامله المدارس العربي حتى لو خاص و بين معامله المدارس الانجليزي

طب هقولكم موقف برده
ايام ما اشتغلت في البنك كان ليا واحد زميلي كان مجتهد جداااا و حمار شغل و محترم اوي
بس كان مدرسه عربي
و ياما اخد كورسات عشان يقدر يمشي في الشغل لان شغل البنوك كله انجليزي
والله مهما هحكيلكم على كم المعاناه اللي كان فيها
ماشي بقاموس صغير في جيبه
كان لما يبقى معاه عميل يستاذن و يجيلي يسالني عن معنى كلمات و نطقها و اقعد احفظه زي الاطفال مع انه كان اكبر مني بست سنين
و نطقه كان بششششششششع
كنت اهزر و اقولله دا انزليجي صعيدي مش انجليزي خااالص

فانتوا فكروا لبكره
يعني عايزين ولادكم ينحصروا بس في شغل الحكومه ولا الشغل الحر ؟؟
ولا عايزين الدنيا تتفتح ادامهم و تسهلوها عليهم و يقدروا يسافروا و يروحوا و ييجوا

انا والله ما اقصد اضايقكم بس فعلا انا بقول الكلام اللي ممكن اقوله لاخواتي لو كان عندي اخوات

والله يا بنات رغم اني مش بشتغل بس دايما لما بتحط في اي موقف و يسالوني خريجه مدرسه ايه بدعي لابويا انه اصر يدخلني انجليزي

طب هتحفكم
عندنا مدارس من اللي كنا مقدمين فيها ليوسف مكانتش بتقبل حد باباه و مامته مش خريجين انجليزي او لغات عموما

فانتوا بس فكروا فيها شويه و بصوا لبكره و مش مشكله نتعب شويه عشان اهم و اغلى استثمار في حياتنا

مادو
انا بشكركم جدا على اهتمامك ربنا يجازيكم خير بجد
بس هتكلم كانى بكلم نفسى مش اعتراض
طب ما فى مدارس المانى وفى صينى حاليا ومش بيخدو انجليزى طب ما العربى اولى1-
2-كان معايا فى اعدادى ناس محوله من لغات ونا حكومى وكان مستوانا حتى فى الانجلش احسن منهم
مساله النطق دى بتبقى طريقه حتى شوفو المدرسين نفسهم نطقنا احسن منهم

3--يعنى ابنى لما يوصل لثانوى بعد كل التعب ده لو لغات وانا مصعبه الدنيا عليه يبقى تنسيقه زىه زى العربى بالظبط
4--عندنا نماذج للاسف خريجين لغات ومش لاقين شغل حتى
5--هروح اتاكد بكرة ان شاء الله لو ينفع نحوله السنه الجايه
وربنا يعمل اللى فيه الخير
يااااااااارب
دوشتكو تانى معلش
انا بحتاس فى شبر ميه
ومش عيزاه يزعل منى او استسهل

رانيا اسبانيش
انا مش مدخله البنات عندي انترناشيونال لا لغات عاديه
يعني منهج العربي هو هو بتاع الوزاره
يبقي هينسوا العربي ازاي بس؟
انا متااااااااااااااااااااااءكده مليون في الميه ان اللي بيدرس من الاول بالانجليش بيكون نطقه و تفكيره مختلف عن اللي بيتعلم بالكورسات بعد كده
المخ بيتبرمج من الصغر
و مش معني ان ناس كانوا لغات مش لاقيين شغل يبقي خلاص طيب ما نص الناس اللي كانوا عربي بس مش لاقيين شغل برضه دي ظروف بلد
و الماث و الساينس مش صعبين و ووالله هيفرقوا جدا لو دخل كليه عمليه مش انتي يا بنتي بيطري و درستي زي البشري عندنا بالانجليزي
صلي استخاره تاني و صدقيني انتي مش بتعقدي الولد لانه مش فجاه هيدري الفيزيا بالانجابش دا هيكون فات عليه 600 سنه في المدرسه و هو بيدرس بالانجليش لما هيكون اتعود علي ما يوصل للفيزيا هتكون صعوبتها من صعوبه الماده نفسها مش انها بالانجليزي

سمرررررررر

انجي

بجد مش قادرة اوصفلك قد ايه كلامك تعبني
شوفي ياستي انا جوايا صراع فظيع في موضوع لغات ولا عربي اينعم حسمت الموضوع
باني دخلت احمد لغات بس يبقى الحال كما هو عليه مش مرتاحة وهفضفض معاكي باللي جوايا
وكل البنات رأيكم كلكم يهمني انا مقتنعة جدا بكلامك ان اللي بيدرس انجلش من الصغر
غير خالص اللي بيدرسه بعد كده في كورسات طيب نيجي لنقطه مهمة هل المدارس اللي
احنا مدخلين فيها ولادنا هي اللي هتعلمهم اللغة مظبوط متتصوريش مضايقني قد ايه حكاية
الانجلش ابو اكسن بتاع الهنود والباكستان طيب هو ده اللي هضحي فيه بتعبي انا وابني وفلوسي طبعا
مش هو ده الانجلش طبعا اللي عاوز يتعلم صح لازم يدخل مدارس انترناشيونال المدرسين فيها اجانب
مش بتوع دول شرق آسيا ولا حتى اللبنانيين اللي في بعض المدارس هنا طيب انا مثلا مقدرش
على مصاريف المدارس دي وابني دلوقتي في مدرسة بتدي منهج بريطاني لكن المدرسات باكستان
يبقى ايه الصح ؟؟؟؟؟؟؟؟؟؟؟؟
ده غير اني مش مقتنعة من جوايا ياجماعة ايوة الدنيا دلوقتي بتفرض علينا انك عشان تشتغلي شغل
محترم لازم يكون عندك لغة محترمة في كتير من الاحيان وليس الكل طبعا لكن ده غلط
احنا عرب ومسلمين ولازم نعتز بده حتى لو الوضع كله حوالينا عكس كده من جوايا رافضه
اني اتخلى عن هويتي انا نفسي ابني يدرس زي مانا درست سدقوني القيم بتفرق الف في المية
وكمان نفسي اركز على القران والعلوم الدينية لانها هي اللي هتنفعه فعلا وهي الله هيدعيلي
لو علمتها له لانها هتنفعه في الدنيا قبل الاخره مش الانجلش هو اللي هيرفع قدره انما دينه
والمدارس اللغات وبالتحديد في السعودية مادة الدين والقران والعربي مواد هامشية والتركيز
عليها مش زي باقي المواد والوقت مش بيسمحلك انك انتي تعملي حاجة فيها من شدة ضغط الدراسة
وانا نفسي بعاني دلوقتي من اللغة رغم اني خريجة صيدلة واللغة عندي كويسة جدا زي مانتي بتقولي
يا انجي ع الورق انما للاستخدام في الحياه العامة او العملية مش بعرف وبحس اني محرجة
لانها مش لغتي ومتعودتش اعمل بيها حوار ونفسي ابني يكون احسن مني وتبقى فرصته في
الدنيا احسن وفي نفس الوقت عاوزاه يتمسك بلغة القرآن
ايه الحل يارب اكون قدرت اوصلكم اللي جوايا عشان تفيدوني
اللهم يسر ولا تعسر
اللهم دبر لي فاني لا احسن التدبير

عطر الشموع

سموره
بصي انا والله كنت قررت مش افتح الموضوع تاني لانه خلاص ميخصنيش
و مفيش كلام هيتقال بعد الكلام اللي انا و رانيا سبانيش قلناه
بس انا و رانيا يمكن عشان درسنا بالانجليزي طوول حياتنا فشايفين
ان مينفعش كنا ندرس اي حاجه تانيه
و شايفين بشاعه الدراسه في الكليات العمليه للناس اللي درسوا بالعربي
بجد معاناه غير عاديه
انت بتقولي انك مشتته يا سمر عشان العربي و لغه القران
بس يا سمر يا حبيبتي العربي ده لغتنا و القران حفظه في الصغر من اسهل ما يكون هو و باقي علوم الدين
يعني انت ممكن توازني بين الاتنين تدخليه دار او انت تشتغلي معاه
تنفذي منهج مع نفسك و تمشي مع ولادك بيه
يعني تحددي مثلا في خلال سنه عده صور يكون حافظها و مجموعه معلومات في الفقه و الدين
و يا انت تدرسيهاله يا تدخليه دار
انما عمر ما لغتنا الام تتعارض مع اننا نتقن اللغات المختلفه
و بعدين انت اهو فهمتي معنى كلامي على الورق الانجليزي بتاعك هااايل بس فعليا بتلوصي و تحسي انك محتاسه
و بعدين موضوع اليميا و الفيزياء و الماث اسهل تريليون مره بالانجليزي من العربي
و عاادي على فكره ان ابنك يدرس باي لكنه مش دي المشكله انما المهمالاساس و الجرامر
وهو لما هيكبر هيحدد طريقه نطقه و خصوصا لو دخل كليه لغات او كمل في كورسات مثلا
الموضوع بجد بعتبره زي الرضعه للبيبي يعني لو رضعها من صغره خلاص هتبقى غذاء اساسي انما لو دخلناله رضعه لما يكبر مش هيقدر ياخدها
و بجد المهم انك تستفيدي من تجارب الاخرين مش تتشبسي براي هو محض الخطا لمجرد انك تقنعي نفسك بانك ماشيه صح
والله يا بنتي انا شفت الناس اللي كانوا معانا في الكليه و كانوا عربي بجد كان عذاب لاني كنت حقوق انجليزي و معظمهم سقط وحول حقوق عربي
يعني حتى محاوله تحسين الفرص مبيقدروش عليها
دا غير ان اللي بيدرس انجليزي من صغره بيبقى سهل اوي انه يكتسب لغه تانيه و تالته زي الفرنساوي و الماني او ايطالي
لان ده بقى مطلب اساسي مش رفاهيهات
احنا في زمن صعب اوي فلازم نحاول نزق ولادنا زقه و اتنين و تلاته
يارب يكون اللي في قلبي وصلك

المشكلة يا جماعة انى مش بقارن ان مدارس اللغات احسن ولا لأ

بالتأكيد هى احسن بس بشرط انها بتدرس اللغة كويس فعلا والطفل بيشربها من الصغر

لكن من اللى باسمعه واللى شايفاه وعايشاه مع بنتى بيقول غير كده خالص اللغة مجرة مادة بتدرس وبنحل عليها شيتات عشان ننجح والعيال بتنجح فعلا وبتقديرات اكسلنت لكن تعالى خلى طفل فى بريمارى 2 فى مدرسة بنتى يتكلم جملتين عن نفسه انجليش مبيعرفووووش وده االلى بحارب فيه فى المدرسة بقالى 3 سنين وللاسف فشلت وزهقت منهم

عمة البنات ولادها فى الفيوتشر فى ثانوى دلوقتى

اتربوا ا الاول اول ما دخلوا المدارس فى مدرسة لغات فى دبى وانا كنت معاهم الفترة دى كانوا ما شاء الله عليهم بيتكلموا كويس جدا عشان المدرسة معوداهم على كده صح

جم هنا مدارس لغات مصر بشهادتى وبشهادة مامتهم وباباهم مستوى اللغة عندهم نزل للارض


انا مقتنعة بكلام رانيا وانجى ان لو الطفل اتربى صح على اللغة بيقى افضل بكتير من انه لما يكبر ياخد كورسات فيها فرق السما والارض بس مش مستحيل

انا كان دراستى عربى طول عمرى دخلت هندسة عين شمس اتصدمت فى اعداى كنت مطالبة انا افهم واذاكر كل المواد بالانجليش ومنها كيميا وفزيا ورياضة غير المواد الهندسية

مكدبش عليكوا فى الاول تعبت جدا وجالى احساس انى هفشل هفشل مفيش مفر وخاصة معروف فى هتدسة ان اعدادى دى مش الكل بيطلع منها على اول هندسة لا كتير بيحولوا كليات تانية

بس الحمد لله مرة والتانية عرفت اذاكرهم والحمد لله جبت تقدير فيهم كمان (مش بكدب والله ده اللى حصل)
واتعودت بعد كده على الدراسة والمراجع كلا انجليش ومبقاش قفى اى مشكلة بالنسبة لى فى الدراسة زى زى خريجين مدارس اللغات بل بالعكس كان منهم اللى بيشيلوا مواد مش عشان مش فاهمين اللغة طبعا لا عشان ما اجتهدوش ومذاكروش عدل كما ينبغى

لكن مكبدش عليكم اللغة كلغة فى الحوار اكيد فارق كتير عن خريجين اللغات الصح وبرغم كده اشتغلت فترة فى شركة مش فى مصر كان كل اللى حواليا مبيتكلموش غير انجليش وكان ماشي الحال بعرف اتفاهم واتكلم بس جمل ما قل ودل مكدبش عليكوا غير الحوار بس كان مقضى الغرض


برضهة انا نفسي بنتى تتربى من صغرها على اللغة اكيد هتبقى احسن منى ولو دخلت كلية زى كليتى يا رب اكيد هتبذل مجهود ااقل منى فى استيعاب المواد على الاقل فى الاول

بس هى فين المدرسة اللى تدى اللغة صح

انا بفكر دولقتى مدخلاها مدرسة بالشيء الفلانى ليه؟؟
1 عشان النضاف
2 عشان اسلامية وبنات بس
3 عشان لغات

طيب 3 حاجة دى مش موجودة ومش باينلها

طيب اول حاجتين يستاهلوا انى ادفع مبلغ كبير سنويا وبيزيد طيب ما انا ممكن الاقى اول حاجتين فى مدرسة تانية من غير اللغة وابقى وفرت مبلغ بيدفع ومش حسة باى فايدة ليه

لسة كنت بشتكى لرانيا

السنة اللى فاتت كانوا بيدرسوا منهج ماكميلان بريتش الولاد ماكنوش فاهمين الدروس ومش بيستوعبوا اى حاجة مجرد بيحفظوا قواعد جرامر وشوية فوكاب عشان الامتحان والامتحان بيجى شويس وتوصيل وكلة بيحل وبينجح زى الفل

تعالى خليهم يركبوا جمل مفيش
جت الاجازة الفوكاب اتنسوا

طلعنا ب 3 سنين بولا حاجة

السنة دى بدل ما يجبولهم مدرسين كويسين يعرفوا ياسسوا الولاد صح
قاموا غيروا المنهج بمنهج ضعيف جدا ااقل من اللى كانوا بياخدوه السنة اللى فاتت

ومدرسة الماث بتكتتبلى فى الديرى كلمات انجليش سبيلنج غلط اشتكيت فى المدرسة قالولى ما هى مش مدرسة انجليش

طب ازاى يا جدعان ما هى المفروض بتدرس للاطفال وبتكلمهم انجليش فى الكلاس
لا حياة لمن تنادى


نفسي حد يقولى على مدرسة فى القاهرة مستوى اللغة فيها عدل ادخل البنات فيها ويكون مصاريفها تحت خط ال 10 لانى بسمع ارقام خيالية

السلام عليكم
ازيكم يا بنات
الموضوع اكيد خلاص استوفي حقه من النقاش
بس تعليق بسيط علي روشانا
انا رائ من زمان في مدرسه بنتك ان مستواها مش حلو و حاولي فعلا تنقلي مدرسه تانيه
لان بنتي نفس السن و بتاخد اكتر كتيير و حتي حصه الانجليش و الماث و الساينس مفيش فيهم كلمه عربي
انا مش اعرف غير مدرسه اسمها اجياد و قريبتي بتشكر فيها غير كده مش عارفه للاسف كان نفسي افيدك و الله
بس برضه في عامل كبير علي البيت اكيد انتي فاهمه يعني انا باخليها تقرا الدرس تاني بعد ما ترجع علشان اصحح النظق و علي طول بتابع معاها دروس الجرامر و نجل تدريبات و املا كلمات جديده
ربنا معاكي و يطمنك ان شاء الله

كلامك صح يا رانيا وفعلا دورت لما غلبت الصيف اللى فات

لكن الاسعار جنان

وكتير اولياء امور بيشتكوا من مدارس ولادهم تقريبا نفس الشكاوى بتاعتى

بحاول الاقى حاجة لغات كويسة وتحت خط ال 10 زى مقولتلك


هشوف اجياد دى وكمان بيشكروا فى منارة الفاروق بس مشكلة السن بنتى داخلة صغيرة مش هيرضوا يحولوها


وبشتغل على قد ما اقدر معاها فى البيت بس عايزة احس بقيمة الفلوس اللى بدفعها فى المدرسة

شوفوا ده اراء بعض اولياء الامور فى بعض المدارس

[ندعوك للتسجيل في المنتدى أو التعريف بنفسك لمعاينة هذا الرابط]


يمكن يفيد حد

رانيا المدرسة اسمها اجيال ولا اجياد ؟؟؟ وفى التجمع ولا فين؟؟؟

رشا الحقيقه المره ان اسمها لا كده و لا كده
ههههههههههه
انا اتحولت تقريبا في ودني
ما علينا
لسه مكلماها حالا قالتلي اسمها امجاد
بتقول في اول المعادي قريب من كارفور
و برضه مكميلان و كويسه اوي
و ب 9 و الباص 2 و شويه تقريبا
مناره الفاروق هي شخصيا عايزه تنقل ابنها فيها هو برضه جريد 2 و بتقول ان ليها فرع جديد ناحيه القطاميه
بس مش عرفت حاجه تانيه
لان قريبتي التانيه اولادها في مدرسه الماني انترناشيونال في التجمع
بس دي نشره اخبار التاسعه
سلام

انا راءي بقي انك تنقلي اسماعيليه و تدخليها مع ندي و نخلص
هههههههههههههههه

يا رانيا القاهرة بقت لا تطاق فى اى حاجة مواصلات مدارس ناس
جوزى نفسة يعيش فى بورفؤاد اعتقد فيها كتير من طبيعة الاسماعيلية

لكن نعمل اية شغلنا حكمنا الحمد لله


بس انتى فرحتينى ان قريبتك عايزة تنقل ابنها منارة الفاروق يبقى سمعتها كويسة فعلا

هو ما شاء الل مسمعتش حد اشكتى منها

الشكوى الوحيدة اللى سمعتها ان شغلهم كتير وبيتقلوا الهوم ورك على الاطفال وده فى راى ميزة ام شريرة انا


ربنا يسهل واقدم ليمنى واللى فى الخير يقدمة ربنا وبعدين اشوف بقى هنقل مين عند مين

اصل انا من انصار لا تضع البيض كلة فى مدرسة واحدة غاوية وجع قلب

مش عارفه المشاركه باينه ولا باظت ؟؟؟

لو مش باينه قوليلي

المشاركة بايظة خالص فعلا

بس قريت المايل جزاكى الله خيرا بس انا وجوزى مش مقتنعين اننا ندخل البنات مدارس راهبات لاسباب كتير يمكن زمان ايامنا كان غير لكن دلوقتى لا والف لا وقولنا ندخلهم اسلامى لغات افضل

مدرسة بنتى بكل مساويءها بس ميزتها اللى مصبرانى عليها لحد دلوقتى ان كل مكان فى المدرسةمشغلين قرءان على طول ووقت الضهر لازم البنات تتجمع وكل واحدة معاها اسدالها فى فى درجها فى الكلاس ويصلوا جماعة ورا مدرسة الدين
وبياخدوا حصص تحفيظ قرءان اضافيه
عن منهج الدين العادى بتاع الوزارة

مش متخيلة انى احط بنتى فى مدرسة وحواليها فى كل حته مناظر واشكال وصور انتوا عارفين مش عايزة افسر
وفى حصص الدين يبقوا هم الاقلية ويجمعوهم من الفصول فى اى مكان يخدوا حصة الدين

انا اول ما ولدت كنت مصممة انى ادخلها رمسيس كولدج بسمعتها المعروفة وشدتهم على البنات لكن مع الزمن واللى بشوفة حوالينا حسيت انه لأ لازم احاول اكبر بنتى فى جو اسلامى جو البيت طبعا وكمان على قد ما اقدر برة البيت


للاسف صعب الواحد كل ما يتمناه فى مكان واحد ربنا ييسر الخير واقدر الاقيلهم حاجة اسلامية تانية بس اللغة افضل فيها