قايمة
ممنوعاتك ممكن تكون واسعة قوي على طفلك و إلا ما كانش هيمل منها و يدي
لنفسه تصريح يساوي الممنوعات ببعضها و مايسمعش كلامك حتىفي الخطر.
الطفل لما بتمنعي عنه في البداية حاجة -مش مفروض تتمنع و مش خطرة -و يجربها
و يلاقي نتايجها فعلا مش خطر .. او تمنعي طاقته انها تخرج بيساوي
الممنوعات ببعضها لأنه بيعتبر درجة الخطورة عندك واحدة .. طيب ما انا نطيت
من على السرير و ماتعورتش.
صنفي المحظورات
لو هينط من على السرير قولي له بصوت هادي .. خلي بالك يا حبيبي ما تتعورش.
النتيجة المباشرة اللي وصلت له من الكلام ان ده هيعوره او هيلعب بحرص قوي
في اطفال عندها حرص و هتلاقيها نزلت مباشرة
و ده غالبا الصغير قوي.
لكن لما بيتعلم يرد و يكون معندوش الحرص ده على نفسه هيرد عليكي على طول بالنفي ..مش هيقول لك مش هنزل بس هيقول لك مش هتعور يا ماما
او ماتخافيش.
لو رد على نفس الكلام و قال لك مش هنزل و ده ممكن يحصل مع الطفل اللي وصل للعند المباشر و عارف قصدك يبقى خلي بالك طوييييييييل
و اتعودي لو بيعمل حاجة غلط فضي ايدك بسرعة وروحي بوسيه و قولي له حبيبي ممكن تخلي بالك من نفسك و ما تتعورش؟
ماتقوليش لا انزل و لا ماتقعش
حطي قدام عينه على طول النتيجة اللي انتي خايفة منها.
مش غلط الطفل يقع خالص و بالعكس ده صحي ليه
لكن الغلط هو انه لا قدر الله يقع بشكل مش مظبوط.
و بعدين بينط على السرير سيبيه ينط .. عادي انتي خايفة من ايه؟
بيشخبط على الحيطة؟ الصقي ورق على الحيطة و قولي له عايزاك تملالي الورق ده رسوماتك الحلوة و انا الصق لك ورق كمان
اشبعي رغبته بشكل عملي
يعني الملخص إياكي تقولي لأ إلا لما توفري بديل مقبول... و صدقيني ده السبب
في ان الاطفال بيعاندوا اهاليهم.. إنك ما بتوفريش بديل لما تقولي لأ و
مابتسفزيش رغبة إنه يخترق قواعدك..لإنك أصلا متواصلة معاه وموافقاه في
رغباته.
دي أمثلة أتمنى أي أم عندها طفل عنيد تجربها و هتلاقي إن شاء الله ابنها بقى مرن جدا .. بس الصبر علشان الاطفال مش بالريموت.
ماتلعبش في الميه...دخليه الحمام و املي له البانيو و اعملي له مراكب او حطي له لعب
طيب احنا في الشتا... لاعبيه في الصيف كده هيسمع كلامك في الشتا لو قلتي له لما الصيف ييجي.
طيب مصر و انتي ماعودتيهوش من الصيف
خلاص هاتي طبق في الحمام وامليه ميه و دخليه يلعب شوية و نبهيه مايبلش نفسه و لما يتبل قولي له كده بليت نفسك.. و غيري له او حميه
من نفسك اعملي كده كمان قبل ما يستحمى لو في الصيف او لو الجو يسمح.
الطفل عايز يلعب في الكهرباء
هاتي له اي لعبة و ركبي لها سلك و شيلي منه القطعة المعدنية علشان لو لا
قدر الله فكر يحطها في الحيطة و يا ريت تحطي فيش الامان البلاستيك اللي
بتيجي من الكهربائي.. رخيصة و ترحمك شوية
و قولي له ياللا صلح لنا اللعبة.
بيتنطط على السرير .. سيبيه يتنطط عادي.. طيب السرير ضعيف .. افرشي لحاف
على الارض و خليه يتشقلب و يتنطط عليه و قولي له ياللا نلعب لعبة الشقلبة و
ساعديه و هو مع الوقت هينسى السرير و لو احتياجه للتنطيط الح عليه هيقول
لك عايز العب لعبة الشقلبة ..على طول افرشي اللحاف
و برضه و انتي بتلاعبيه قولي له لما تعوز تلعب الشقلبة قول لماما و هي تفرش لك اللحاف على طول
و خلي بالك الجملة بالطريقة دي مهمة
لو قلتي له لو عايز تتنطط على السرير قول لي و انا اتصرف او و انا افرش لك اللحاف يبقى مانسيتيهوش الحاجة اللي انتي عايزاه ينساها
وفري بديل و غيري مسماه و علميه يطلب منك البديل و ساعديه.. دي خطوات مهمة لتطويع ا لطفل وتغيير عاداته غير المقبولة
عايز يولع الكبريت ... قولي له انت بتولع الكبريت علشان عايز تنور
المكان؟؟طيب تعالى كده و انا هوري لك مفاجأة بس ما نمسكش الكبريت تاني
و هاتي له كشاف صغير (مش لازم حاجة غالية) و ضلمي الاوضه و وريه و هو بيسلطه على القطع اللي في الاوضة.
بس دايما تشيلي البديل بمجرد الانتهاء من استخدامه علشان لما يحب يعمل
الغلط يفتكر على طول البديل اللي انتي عرفتيه انه مكان الغلط ده و هيشتاق
له و يطلبه منك
بيشد التليفزيون .. قولي له بلهجة انت الخسران ..وقع التليفزيون علشان يتكسر و انت اللي مش هتشوف كرتون (كذا) تاني
و مباشرة ممكن تسأليه عن لعبة مختفية بيحبها او شخص بيحبه ..غيري اتجاه تركيزه بسرعة.
عايزة تمنعي عنه حاجة فاوضيه
يعني مطلع كل لعبه على الأرض قولي له لمهم كلهم و إلا هشيلهم.
لو رفض شيليهم كلهم في ايدك و خديهم علشان تشيليهم في الدولاب مثلا(مكان مايعرفش يوصل له)
هيصرخ و يشدهم قولي له بحزم اختار لعبة..لا عايزهم كلهم .. قولي له خلاص بلاش تختار .هشيلهم كلهم
صري لغاية ما يختار لعبة و لمي الباقي في صندوق اللعب و نبهيه..لو عايز لعبة حط واحدة من اللي معاك و خد واحدة من الصندوق
و هكذا.. علميه يختار من البدايل و يقدر الخساير .. هيتعلم ان ما لا يدرك كله لا يترك كله.
وبلاش اوامر لو طفلك عنيد.. استعملي صيغة الطلب ووضحي الخساير بس اختاري خساير تأثر فيه.
ماتقوليش ماتعملش كذا... قولي له مثلا لو عملت كذا هيحصل كذا .. او ممكن تكتفي بكلمة غلط بلهجة حادة ..او ممكن نسيب كذا... و هكذا
السبت 28 مايو - 23:11
