مشاركه للى منتظرين مولود جديد
نصايح ما قبل الولاده
بالنسبة لنصايح ما قبل الولادة إن شاء الله و خصوصا
إن الفترة اللي متبقية إن شاء الله مش كبيرة فمفروض تكوني مهدتي إن في
بيبي جاي إن شاء الله بكلام يا دوب هي تفهمه...و لما تكلميها عن
البيبي إن شاء الله ماتقوليش بيبي ..قوليلها أخوكي أو أختك علشان دي علاقة
بتتبنى من الصغر..و طبعا هدية البيبي دي حاجة مهمة..من دلوقتي تجهزي شنطة
المستشفى و فيها هدية البيبي اللي طبعا فيها حاجات هي بتحبها جدا و ... و
حاولي بصيغة بسيطة تجيبي هدية صغيرة و منها اتنين واحدة ليها وواحدة للبيبي
و قولي لها ادي دي لأخوكي او اختك... و تكلمي البيبي شوف مريم جابتلك
ايه..و لما البيبي بس يغير شكل وشه اعملي قصة..يعني لو ابتسم أو شكله كأنه
بيبتسم تقولي لها ايه ده..هو بيضحك لك؟ و لما البيبي يعيط و انتي عندك
طريقة عارفة انه هيهدأ بيها زي مثلا وقت رضاعة البيبي او حاجة بتهديه قولي
لها تعالي علشان انتي اللي تعرفي تهدي البيبي ..طبطبي عليه كده..و تكوني
طبعا من الناحية التانية بدأتي بدورك..و مجرد ما البيبي يهدأ تقولي لها
شطورة ..البيبي بيحبك؟ مريم اللي بتعرف تساعد البيبي بس؟ على هيئة سؤال
علشان تتجنبي الكذب...و على نفس النمط استغلي حركات البيبي التلقائية في
انك تديها احساس ان البيبي ده يشبهها و فرحان بيهاا و ما بيحبش حد قدها و
هكذا... و لما الزوار ييجوا إن شاء اللله ياخدوا الإذن منها حتى لو ده محرج
ليكي شوية ..قرأت مرة إن أم كتبت على باب حجرتها طلب من الزوار يسألوا عن
الولد الأكبر قبل البيبي ..و برده ماتسمحيش بموضوع مريم أحلى و البيبي وحش
علشان ده مش حلو لبعد كده إن شاء الله.. اللي يقول كده قوليلها الحقي يا
مريم ..البيبي وحش؟ لا طبعا مريم و البيبي حلوين زي بعض..و لما تيجي تشوف
البيبي في المستشفى إن شاء الله ماتشوفكيش و انتي مرهقة قدر المستطاع و
اللي يوريها البيبي يقوللها شوفي ربنا بعتلك هدية تلاعبيها..و يبقى جميل لو
تجيبيلها عروسة بيبي لها مستلزمات زي البيبي (لو مش عندها) و تخليها تعمل
زيك علشان حب الاستكشاف و التقليد ماينطبقش على البيبي ..و ربنا يطمنا
عليكي
الإثنين 18 أبريل - 21:45
