افكار وتجارب ميرو السريع

بعد اذتك يا ميرو هضيف بعد التجارب اللى حسيتها مفيدة ولها تأثير فعلا مش منقولة



تونيك للوجه
بجيب ازازة ماء ورد وافضى منها فى ازاة تانية يبقى نصها ماء ورد ونصها زيت لوز مر وحطاها جنب المراية فى الحمام وجنبها كيس قطن عشان ميبقاش ليا حجة

زيت اللوز المر مشهور بتأثيرة الرائع على الهالات السودا وبيخلى البشرة نقية

المفروض ا دعك بقطنة وشي الصبح وباليل واكيد بدخل الحمام الصبح وباليل

لكن انا كسلانة شوية ممكن فى اليوم مرة او كل يومين

بس جربوها هتدعولى


وممكن زيت اللوز المر بس تدهنوا بيه وشك كله وخاصة حول العين هو بيحرق شوية بس مفيد جدا وكفاية لو لوحدة مرة واحدة قبل النوم
وكنت سمعت معلومة قبل كده لو دهنة وشك بزيت اللوز المر الافضل تروحى تنامى على طول عشان لا يفضل انك تتعرضى لشمس او لضوء

بس انا مجربة التونيك اللى فوق ده الصبح قبل ما انزل لفترة ومجراليش حاجة متقلقوش

سمعت كتير على فوايد ورد السدر للشعر وسمسمة جزاها الله خيرا تقريبا كانت قالت على الفكرة دى وانا نفذتها

نغلى مية ونحط فيها ورق السدر ونسيبة شوية وبعيد نصفيه ونحطة فى ازازة بخاخ وفى الحمام كل ما تدخلى الحمام تبخى منها على شعرك على منابت الجزور بتقويقة

انا جربت الفكرة بس زودتلها فى البخاخ شوية زيت لوز مر وشوية زيت جنين قمح وشوية عصير جرجير
عصرت الجرجير فى الكبة مع شوية مية وصفيتة

بجد لما استمرت على الخلطة دى اسبوع حسيت بفرق فى شعرى

لتساقط الشعر الكتير فيه تونيك اسمه كامينو موتو هو غالى بس حساها بجيب نتيجة كويسة من افضل التونيك اللى جربتها للشعر
طبعا بالضافة الى بانتوجار فيتامين للشعر

خلطة لتعطير الفم والحفاظ عليه طول الليل من البكتريا

علبة صغيرة فى الحمام فيها قرنفل وقرفة وملح مطحونين

وبعد ما تغسلى سنانك باليل خدى شوية على صباعك وادعكى اللثة كويس فوق وتحت واتمضمضى بشوية مية صغيرين

وممكن تستخدمى المضمضة دى بعد اكل فيها توم مثلا بتخلى رائحة الفم حلوة وبتقوى اللثة وتحمى الفم من البكتريا


بالامانة انا مش فاكرة اصل الفكرة بتاعة مين فلو حد منكم يسامحنى واكيد ربنا عالم وهيكتبله حسنة

لتعطير الدولاليب

دولاب البنات كان جاى ريحة الخشب فيه مش حلوة

جبت زيت عطرى النوع المفضل عندى اسكادا جرين
رخيص الازازة ب 7ونص مثلا وفى ااقل هو بيبع بالجرام والجرام ب 2 او 3 وفيه بجنيه
فى جميع الانواع فل ياسمين اى حاجة اللى يعجبك ريحته

وجبت قطنة ومسحت بيه الخشب من داخل الدولاب كل الاماكن البعيدة عن الهدوم من الجنب والسقف

وبقى ريحتة حلوة


وممكن الزيت العطرى دى ترشى منه على الارض بعد المسح فى اخر لفة دى فكرة ام البنات تقريبا
او تمسحي بشوية ميه بيه ازاز الاوض او المرايات



وفى فكرة للتعطير جربتها بتاعة ميرو تقريبا

كل شوية ابخ فى الدولاب من سائل داونى وده مش مشكلة لو جه فى الهدوم مش بيبقع

وكمان ببخ منه على السجاجيد لما يبقى جايلى ضيفوف بيخلى ريحة السجاجيد والجو منعشة وكأنة لسة ماسحة كل الشقة حالا

فى فكرة فى دماغى بس لسة منفذتهاش

للاطفال

طبعا عارفين ولادنا حلويين ازى وبياكلوا كل حاجة مغذية (العكس طبعا)

قريت كتير على فوائد جنين القمح مش الزيت لا حاجة كده عاملة زى القشور

بيقولوا مفيد جدا وبيقوى المناعة

وبما اننا داخلين على الشتا والاطفال بتعيا كتير

بفكر اجيبة للعيال واحطلهم كل يوم رشة منه على طبق ا الرز والخضار اعتقد مش هيبان



انا كمان ساعات بحطلهم لبن وية على الرز واقلبة مش بيبان مع الرز والخضار لانهم مبيرضوش يشربوا اللبن لوحدة


بستبدلة بالزبادى واللبن الرايب بس برضه مش وحش وبيزود القيمة الغذائية للوجبة

اى شوربة تزيد عندى فراخ او لحمة بصفيها واعبيها فى اكياس فى الفريزر

لو شوربة فراخ بستخدمها فى الملوخية كيس شوربة على كيس ملوخية وشوية رز للعيال

او بعمل بيها بشاميل بحب طعم البشاميل اكتر بالشوربة بحط فى الكسرولة شوربة ولبن كميات متساوية يغلو احطلهم معلقة زبدة وادوب فى كوباية باكو بشاميل كنور وانزل بية عليهم واقلب يبقى عندك احلى بشامي



لو شوربة لحمة بطبخ بيها خضار ساعات لو عملة فراخ مشوية او اى صنف لحوم مش بيتسلق وعايزة تعملى جنبة رز وخضار

او اكلة الانقاذ لو معنديش حاجة ومش عايزة افكر كيس شوربة لحمة مع كيس شوربة خضار بسمة وفى الحلة وشوية مية ويستوا مع بعض على ما الرز يستوى

وبعد ما تستوى شوربة الخضار بضيفلها شوية لبن طبيعى اخف من الكريمة وبيدى طعم لذيذ

ميرو قولتى على بودرة ليم لتنظيف الاستانلس تقريبا

ان شاء الله اجربها