صديقاتي الأمهات اللي ولادهم داخلين كي جي 1 و أول خبرة ليهم مع المدارس
حبيت أفيدكم بشوية نصائح استفدتها من خبرتي مع ابني هو داخل اولى ابتدائي
1- قلق الأم و الأب :
من المحتمل تكوني قلقانة شوية من الخبرة الجديدة
بس حاولي قلقك ما يبانش للطفل لأنك مصدر الأمان للطفل
زي قبطان السفينة لو حس انك متلخبطة يبقى هو حيقلق أكثر
ممكن تحكي له ذكرياتك في المدرسة أول يوم حتى لو قلتي
انك كنتي خايفة و عيطتي قولي له بس بعد كده اتعرفت على صاحباتي
و بقيت أحب المدرسة .........
2- قلق الطفل :
فهميه انه طبيعي يبقى قلقان
حتى ماما و بابا ساعات بيبقوا قلقانين من حاجة جديدة هما لسة مش واخدين عليها
بس بعد كده بناخد على الجو الجديد و بنصاحب ناس و ما بنبقاش قلقانين
3- ليلة أول يوم :
خليه يساعدك في توضيب لبسه و شنطته و بيني فرحتك بحاجاته
و طبعا ينام بدري و فهميه ان الألتزام بالمواعيد حيخليه من الشاطرين
و في المدرسة يبقوا مبسوطين منه
4- جهزي معاه سندوتشات و عصير و ممكن فاكهة
عادة الميس بتدي أول نص ساعة للفطار و ده أول يوم بيدي ألفة
و بيضيع القلق
5- صحيه من بدري و انتي سعيدة و قولي له ان شاء الله حتتبسط
6- طبعا حتروحي معاه الكلاس يا ريت من بدري عشان تختاري مكان مناسب
7- اتعرفي على الميس و ممكن تسأليها عن رقمها و اديها رقمك للطوارئ
8- حاولي ما تطوليش مع الطفل في الكلاس هو طبعا حيعيط طمنيه و قولي له كله حيبقى تمام و الميس حتعرف ازاي تتعامل معاهم ما تقلقيش
9- غالبا أول يوم بيدوا ورقة فيها الطلبات يعني نوع الكراسة و الجلاد
و بتستلموا الكتب
10 جيبي تيكت شكله ظريف و اكتبي اسم الطفل و الكلاس بوضوح على الكتب و الكراسات
11- جيبي جلاد شفاف بيلزق للكتب و الكراسات ألوانها حسب ما يطلبوا
12- خلصنا من هم التجليد اقعدي مع الطفل و خليه يتفرج على الكتب و انتي فرحانة بيه
13- المذاكرة :
أهم معلومة لازم أقولها لك ابعدي عن التوتر و النرفزة
و لازم لازم كمان مرة لازم تعرفي ان مدة التركيز عند الطفل قليلة جدا لا تتعدى 10دقائق
يعني ما تفكريش انه ابنك لعبي و لا مش قاعد على بعضه لأ ده طبيعي
تعملي ايه يا قمر لما تيجوا تذاكرو ا :
* تختاري وقت يكون ارتاح فيه و اتغدى و لعب شوية و بقى خلاص مهيأ للمذاكرة
* اختاري مكان هادئ و ثابت لمذاكرته
* اطلعي على كل الواجب المطلوب منه الأول
* حاولي يعتمد على نفسه قدر الامكان و قللي مساعدتك حتى في بري الأقلام
*لما يجي يكتب الواجب احرصي انه ياخد راحة كل 10 دقائق لمدة دقيقتين
عشان تعلي التركيز ثاني
* وقت الراحة ده ممكن يجري أو يتنطط أو يعمل تمارين بسيطة كل ده بيزود تدفق الدم للمخ
و بيساعد على عودة التركيز
* لو زود عن ساعة اديه راحة أكبر شوية 10 دقائق أو ربع ساعة
* ممكن ياكل حاجة خفيفة أو ثمرة فاكهة و في حركة لئيمة قوي كنت باعملها :
كنت باطبع شيتات ألعاب تعليمية من النت اللي هي صورة دورا مثلا يوصل الأرقام
عشان تبان الصورة ( هو فاهم انها لعبة في حين انها مذاكرة برضه ههههههههه)
شوفي كده الموقع ده:
فيه على الشمال صفحات تتطبع عن كل شخصيات نيكلوديون
زي دورا و ثلاثي العجب و حاجات تانية في تلوين - توصيل - ماث .........
في منتهى الجمال
[ندعوك للتسجيل في المنتدى أو التعريف بنفسك لمعاينة هذا الرابط]
* علميه بعد ما يخلص يلم حاجته و يحطها في الشنطة بنفسه
14- ساعات كا ن بيطلب مننا واجب احنا الأمهات زي لزق صور عن الحروف أو المناسبات
احرصي انك تعمليه عشان ابنك ما يضايقش أو يحس بالتقصير
لأني للأسف كنت باشوف أمهات بتنطش .
15- حاولي تبقي على اتصال بالميس عشان تتابعيه دايما
أرجو اني أكون قدرت أفيدكم شوية و لو حد عنده استفسار أنا تحت أمركم
الجمعة 24 سبتمبر - 22:02
