رحلة للاقصر واسوان

الحلقة الأولى : قبل السفر لأى مكان عليك بالاستخارة و الأستشارة .تحديد الميزانية و الأفضل طول السنة اقتطاع جزء بسيط من المصروفات لرحلة صيفية مع الأسرة أو شتوية أو رحلة العمرة حتى لا تختل الميزانية . بالنسبة لأسوان أو الأقصر هى رحلة لابد أن تكون فى فصل الشتاء أفضل وقت لها من يناير الى مارس .اختيار وسيلة السفر . المسافة طويلة أفضل وسيلة من وجهة نظرى و مناسبة للأسر الكبيرة هى القطار ..القطار الدرجة الأولى ب 100 جنيه الفرد و الثانية ب 50 و فيه قطار النوم و أنا أفضله جدا و تذكرته 325 جنيه . كل ده ذهاب فقط . طبعا لا تتوقعوا أن قطار النوم يعنى هتناموا فيه . احنا فى مصر و السكة الحديد مليانة مطبات .لو بالنسبة لكم دى خامس مرة بتسافروا فى قطار النوم يبقى هتناموا زيى كويس جدا . من النصائح أنكم تتعبوا نفسكم جدا فى يوم السفر قتقدروا تناموا . طبعا دى فرصة أشكر الشركة الوطنية لقطارات النوم على التعامل الراقى و الخدمة الممتازة بجد . قطار النوم بيقدموا وجبة عشاء ساخنة فعلا مستواها جيد جدا . لو نويت تسافر لازم تحجز قبلها ب 15 يوم أوتعمل زينا و تحجز من النت مع شركة احجزلى . فيه زيادة بسيطة لكن ممتازة و لا تتقيد بوقت محدد . لكن
دايما احجزوا قبلها بوقت كاف .فيه وسيلة تانية للسفر جميلة و هى الطائرة و سعرها 600 جنيه
. لكن أنا شايفة أنها للمجموعات و الشباب اللى عاوز يشوف بلده هتكون مكلفة .بالنسبة للقطار بيكون فى التذكرة رقم القطار و الرصيف و رقم العربية اللى بنركب فيها فمن المهم الأنتباه لها ده بيسهل ركوبك بهدوء . محطة مصر أصبحت منظمة و جميلة و فيها كافتيريا فوق للأنتظار ممكن تشرب شاى أوقهوة و الأسعار أغلى شوية من بره.قطار النوم آمن جدا لا يمكن لأحد أن يدخله و تغلق الأبواب و عليها حراسة و فيه عربية النادى تقدر فيها و لوكنتم مجموعة تتكلموا و تشربوا مشروبات أو كروسان و باتيه وكيك بسعر معقول .
للى يحب طبعا يسافر مع مجموعة ترتب كل شئ فأنا أنصح بجمعية أعرف بلدك لأنها فعلا بتطلع بأسعار التكلفة وبيهتموا جدا بالناس أو جروب تنشيط السياحة أنا لم أذهب معهم لكن أجدهم ناس رائعيين بصراحة .
يفضل للرحلات دى أن الواحد أقل شئ أسرتين مع بعض أو ثلاثة علشان تتقسم أسعار المراكب النيلية أو الأانتقالات الداخلية عليهم فتقل التكلفة

الموضوع منقول لمدام علياء العزازى جزاها الله خيرا

الحلقة الثالثة :النوبة عند أهلها ليست الأرض والبيوت، وإنما روح وحياة جمال ساحر وحب في القلب يجري بالعروق مجرى الدماء يشكل عاطفة لا مثيل لها حب ينبض بالحياة فيجعل لها معنى وقيمة. النوبة لوحة فنية رسمها الخالق فأبدع وأحسن تصويرها، هي أرض الخيرات بلاد السحر والجمال، عشقها أهلها وأُجبروا على التهجير منها حبًا لبلدهم مصر... من أجمل الأماكن اللى لابد من زيارتها الجزر فى أسوان ... جزيرة هيسا مكان رائع يتم الوصول اليه بالمركب و هو يقابل معبد فيلة ... مكان صاحبه اسمه فيليكس هو عامل فندق غير تقليدى و بيقدم وجبات فممكن تقضوا يوم على الجزيرة طبعا المكان ساحر . كمان ممكن تعملوا جولة بالمركب فى بحيرة ناصر رائعة و فيه جزيرة اسمها جزيرة التمساح تنزلوا عليها ركوب بدلات وتعوموا فى النيل و تلعبوا و تستجموا و فيها كافتيريا . ممكن يوم فى جزيرة النباتات أو فى جزيرة اسمها فوكس كلهم عندهم استضافة و غداء . لكن أهم شئ لاتنسوا و أنتم فى المركب عند المغربية تنزلوا تشربوا القهوة النوبى اسمها جبنه بالفتح كل حروفها ... رائعة و انكم تتفرجوا على خطوات اعداها حاجة تحفة .النوبة لها لغة خاصة لا تكتب ولكنها مسموعة وكلهم بيتكلوها و لما بتقعد معاهم 3 أيام بعد شوية بتتعلم منهم شوية كلامك و بيتبسطوا لما بيلاقونا بنتكلم معاهم نوبى .النوبة كلهم مسلمين و هم أصل مصر و جزء لا يتجزأ مننا .. لا يصح أن نتركهم مهمشمين . كان لهم دور رائع فى حرب أكتوبر و السادات استخدمهم فى سلاح الأشارة مما اربك اليهود لأنهم كانوا ينقلوا الاوامر باللغة النوبية التى لم يفهمها اليهود فساعد ده على اخفاء المعلومات تماما . مازلت أجدنى أعيش بعبق النوبة و جمالها و أحملها فى قلبى و يارب أسعد أهلها كما أسعدونا .

الحلقة الرابعة : أسوان و النوبة و سحرهما الذى لا ينتهى حبيت اكتب لكم عن الجديد لكن طبعا الزيارات معظم الناس تعرفها سواء السد العالى و معبد فيله و متحف النوبة و السوق القديم فى أسوان و فيه دير الأنبا سمعان و مقابر النبلاء و حاجات كتير .. لكن أنا ما أحبه هو النيل و الجزر و الناس . انتقلنا للأقصر و بصراحة كنت زمان لا أفضل مدينة الأقصر و اكتفى بأسوان لكن المرة دى قررنا قضاء 4 أيام بها و كان الحمد لله اختيار موفق . تبعد الأقصر عن أسوان حوالى 4 ساعات ممكن بالقطار لكن احنا فضلنا سيارة خاصة لتكون أكثر راحة وتنقلنا من الباب للباب .الشاب النوبى الرائع اسلام كان معانا بيحكى لنا عن النوبة طول الطريق .كان اختيارنا لفندق الأقصر منتجع على النيل بعيد شوية عن وسط البلد اسمه سوفتيل الكرنك و دلوقت اسمه ميركيور فندق خمس نجوم حجزناه بالموبايل و الحقيقة ا. نشأت حسانى مدير الحجز قام معانا بواجب رائع فى اختيار الغرف و الترحيب و ترتيب كل شئ بشكل رائع .الأسعار مش غالية الغرفة الدبل 300 جنيه لفردين بالفطار . المكان فوق الوصف و المعاملة منتهى الكرم . طبعا الجميع يعرف آثار الأقصر . أجمل 3 حاجات كانت بالنسبة ليا تغيير لفكرتى عن الاقصر .الفندق و البر الغربى والمنطاد .أكلمكم فى البوست القادم عنهم .

الحلقة السادسة : المنطاد ... برغم رعبى بصراحة من موضوع المنطاد الا أن روح المغامرة غلبت و قررنا نجرب نطير و خاصة ان دى أمنيه ليا من زمان . بصراحة عجبنى تنظيم الناس جدا واجراءات السلامة أخدونا من الفندق بسيارة سياحة ثم مركب مع تقديم افطار مكون من شاى و قهوة و كيك . وبعدين عربية لمكان المنطاد و تهادى بنا فوق أجمل مكان فى مصر و شفنا شروق الشمس و نزلنا بأمان و رجعونا للفندق . رحلة جميلة لازم تجربوها لو مرة فى العمر .

-------------------