الطفل الرخم

ظاهرة "الرخامة" مشهورة خصوصا عند الصبيان و خصوصا لما بيعدوا سن 4
سنوات.و بعض الأسر بيسموه سن الرخامة.بصراحة أنا برفض الصاق التهمة دي في
السن...لإن في أطفال في السن ده لا تملي مجالستهم.

في البداية نقدر نقول كسبب عام منغير تفاصيل..هي طاقة ..إما زائدة و غير موظفة..أو ان الأسرة وافقت أو ساعدت الطفل على سوء توظيفها.

الطفل لما حد بيقوله يا رخم أحيانا بيزود لو هو فاقد الاحساس بشخصيته و حاسس بإنه مش بيحصل على الاهتمام الكافي..للفت النظر .
لإن هدفه ممكن يكون ببساطة إنه يقول ليه ماحدش شايفني ..طيب أنا هنا.
كمان الطفل ممكن يكون مش متعمد يضايق حد خالص بس هو ماتعلمش يعبر عن
نفسه بشكل مظبوط.يعني بعض الأطفال نموهم الفكري بيكون وقف عند مرحلة معينة
و سنه و إدراكه سبق..أقصد إن الوالدين توقفوا عن تطوير قدرات طفلهم
الفكرية و الاجتماعية في مرحلة معينة و الطفل سنه كبر لكن باستيعاب سن
أصغر منه فبيبان لغيره رخم و هو مش كده...
في طفل تاني بيبقى فعلا رخم أو بمعنى أصح ماحدش وضعله قواعد سلوكية
لائقة ..فبيتصرف زي ما ييجي في باله و بس.. ماتعلمش مراعاة الوقت المناسب و
الوقت المناسب و تقدير السن الكبير...و بالتالي بيتصرف منغير ضوابط
فبتبقى تصرفاته مش مقبولة.


نمي هوايات طفلك... زودي حصيلة معلوماته... حاوريه ..و علميه يعبر عن نفسه...
و افخري به (حتى لو قال الجميع إنه رخم و حتى لو انتي شايفة كده) لإن
احساسه بثقتك فيه و اعتزازك بيه بيساعده يسمع كلامك و يطور نفسه للي انتي
عايزاه.. و ممكن تكون كل مشكلته عدم ثقة و احساسه بعدم الاهتمام..اديله
الإحساس اللي ممكن يكون محتاجه (في محله ) و إن شاء الله ممكن جدا المشكلة
تختفي.

لكن طبعا عليكي بالدعاء لإن الله وحده قادر على أن يغير أي شيء و يصلح ما فسد(إذا كان هناك ما فسد -لا قدر الله)