الوصفة دي من ميرو
و انا جربتها تحفه
السلام عليكم ورحمة الله وبركاته
ازيكوا يا فتوكات كل سنة وانتوا طيبين دخل فصل الصيف على خير
وطبعا مشكلة العرق والتلزيق بتقلق كل البنات والسيدات انا جاية النهارده
معايا وصفة سهلة وجميله جدا وأمنه جدا على البشرة افضل من المزيلات اللى
بيدخل فى الكيماويات وبتسبب الامراض الكثيرة ربنا يعافينا وبكل أمانه انا
اخذتها من اخت لينا هنا فى المنتدى جزاها الله كل خير وياريت كل الفتوكات
تجربها انا بستعملها وانا دلوقتى فى الشغل وحطاها مريحانى جدا ندخل بقا فى
الموضوع و المكونات
2م كبيرة فازلين من الصيدلية
2م نشا طبعا ( بيبيض المنطقة دى بدل بهدلة المزيل )
2م كربوناتو من عند العطار طبعا كلنا عارفينه ( وده بيقتل الميكروبات اللى بيسببها العرق )
1م زيت عطرى اللى تفضليه ده بيتباع عند اى عطار
انا جبت زيت الليمون بجد رحته تحفه جدا وبيمنع العرق ورائحته يعنى كله
طبيعى جدا وممكن المسك الابيض تحطى نقطة منه فوق الوصفة دى بيدى رائحة
جميله جدا مع زيت الليمون
جربوا وادعولى وادعو الاول للاخت اللى كانت السبب فى الوصفه دى
وعلى فكرة دى ممكن تقعد معاكى كتير اخفظيها فى علبه كريم قديمة وخدى منها
كل يوم وادهنى تحت الباط بيها بعد ما تخدى الشاور بتاعك وبجد هترتاحى جدا
اذا عجبك الموضوع قيمى علشان اكبر قدر من المفتوكات يستفيد
ودمتم فى جمال وسعادة وهناء