جدول تنظيف البيت

مين يبدا معايا حمله تنظيف على البيت والمطبخ والحمام
بوقت صغير فى اليوم
وكل يوم حاجه ونحافظ عليه علطول نضيف
عشان منضيعش ايام فى تنضيف وتنفيض
انا هبدا ان شاء الله
مين معايا



وبما ان فيش مناسبات هنخليها توضيب بالبراحه كده وفى الروقان
اول يوم هنفض البلكونات والشبابيك حتى بتوع المطبخ والحمام انا بحب ابدا من بره واخلص من التراب كله
لو اسبوعى انا بنفض بالمقشه اليدوى وبخلع الايد بس ابدا بالشيش وبعدها السلك وبعدها السقف وبعدها الحيطان بكنسها بالمقشه وبعدها الارض
ولو حد بيبنى انصحه بلاش الزخارف الجامده فى الحديد دى بجد متعب جدا فى التنضف
وبعد ما اخلص بفوطه مطبخ او اى حته وانفض كله
لو شهرى او حسب الحاجه يعنى بجيب اى سفنجه اطباق قديمه واغسله بماء واريال واحيانا كلور المهم اسيب الميه دقيقتين وامسح تانى بيكون اسهل واشطف بماء فى قماش برده مش لازم نغرق الدنيا
افك الشفاط واغسله فى واللى مش عامله يعمله
كده بره كله خلص واكمل تنضيف يومى عادى وشغل المطبخ والطبيخ وكده
تانى يوم نخلص من تراب البيت من فوق لتحت يعنى فوق الدواليب والمكتبه والنيش وحتى دولاب المطبخ نغير الورق اللى عليهم كلهم وبصراحه الخطو دى بتحسسنى بالنضافه بجد بس
وكمان بشيل الادراج واكنس وامسح مكانها فى ناس بتنسى الموضوع دة وقوق الستاير والستاير تتنفض ونمسح اللمبات
الاسبوعى باه فوق الابواب بنفضه بالمقشه برده فوق السخان فوق البراويز او اى لوحه
السقف بعمله بالزعافه وممكن البس المقشه قماشه وامسح السقف والحيطان على الناشف كده وانفض الصالون وامسح تحت الصالون بمنفضه ريش نعام عشان لو فى عنكبوت ولا حاجه
اجيب اى حاجه رفيعه وطويله زى مضرب الناموس كده وامرره تحت الاثاث اللى صعب يتحرك زى الدواليب والنيش
عشان اخرج اى حاجه تحته ولو خيوط عنكبوت
واتنى المراتب واكنس تحت السراير واكنس الشقه كلها عادى وكل فترة باستخدم المكنسه الكهربا واشفط تراب المراتب واكمل تنضيف يومى
تالت يوم
للادراج والدواليب من الداخل وبجد المحافظه هتخلى الخطوة دى سهله اوى
انا الدولاب عندى دايما مرتب الحمد لله بس برتبه عشان امسح الارفف او اغير من النظام وكمان عشان افتكر هدومى
لانى البس حاجه اغسلها والبسها تانى وانسى باقى هدومى كلها عشان كده بحب اقلب الرفوف
وفكرة الرول فى التطبيق بجد حلوة جربوها فى حاجات معينه طبعا
والادراج برده فكرة استغلال العلب فى الترتيب حلوة اوى وبتخلى اى درج مرتب فترة اطول حتى درج المكياج

رابع يوم اكنس البيت عادى واخرج السجاجيد والمشيات بره فى الشمس وانقضهم
وادخل امسح الشقه كلها باى مطهر لازم يوم فى الاسبوع وانا بحب الكلور بيبيض السيراميك
وبغير احيانا بديتول او جاز التغير حلو برده
اسيب الشقه تتهوى وتنشف وادخل الفرش افرشه
كده وضبنا فى السريع لو لغينا الحاجات الشهريه واللى بتتنضف فى المناسبات انا بحكى عشان اللى مش منضفها ينضفها لان مفيش مناسبات قريب
وكل يوم نتسلى على حاجه عشان تاخد راحتها فى التنضيف بدل ما نكروت فى النص
نكمل بكرة لو تحبو
كل يوم باب يتمسح نجفه تتلمع بميه وخل فى قماش والهيكل على الناشف طبعا الاباليك كبس النور بندعك بفرشه سنان اسهل بكتير من اى طريقه تانيه ادوات كهربيه ممكن بالنفخ بالمكنسه او السشوار وبعدها نمسح ونلمع
تلميع اثاث بفرشه جزم وممكن ورنيش
عايزين نتفق كل يوم نطلع حاجه بره فرش سرير بطانيه سجاده
لاننا مهما نضفنا الشمس اهم مطهر للبيت
بالنسبه للمطبخ
بجد مبقاش ليه يوم خاص انا اتعلمت يبقى نضيف علطول بدولابه وحيطانه وبوتاجازة وارضيته كمان
اريح كتيييير جدا طبعا
احنا خلصنا فوق الدولاب والشفاط والبلكونه مع الشقه
نفرغ الدولاب يستحسن كل يوم ضلفه عشان منتعبش
وننضف حسب نوع الدولاب
المهم الترتيب عشان يقعد فترة طويله
ضلفه للادوات الكهربيه وكل امجموعه من الكيتشن ماشين فى كيس لوحدها
وضلفه للتوابل والزيوت انا بحط الزيوت والسمن فوق ,المتخزنه وره واللى بستعملها قدام
وتحت التوابل ومطبقه فكرتين من المنتدى هنا طقم التوابل بتاع الملح والفلفل وكده حطاه فى صينيه فطار مدوره وبدورها براحتى
الفكرة التانيه عندى فل حطاه ورة وحطه عليه مجموعه توابل فى برطمنات
والرف اللى قدامها على الدولاب يعنى عشان يبقى عالى وتشوفى اللى وراة
والباقى فى التلاجه طبعا
الظلفه التالته علب التلاجه وبرطمنات فاضيه يمكن اعوزها ومخلالات وكده
ونوضب الادراج ونرتب برضه باستخدام العلب
وتحت باه الحلل وكده وعمله شماعه حطه فيها غطيان الحلل مساعدانى فى الترتيب
وننضف تحت الحوض وكده
البوتاجاز لو بقاله فتره نستخدم الجاز وخصوصا للسنادات
غير كده كله بملح الليمون ونفسى افك زجاج باب الفرن اعمله بصراحه مجربتش لسه
والباب اللى تحت الفرن تفتحيه وتنضفيه برده ممكن يكون فيه تراب
وننضف تحت الغساله وجوه الفرن الكهربا او الميكرويف
ونغسل الحيطان بسائل الاطباق وملح الليمون
بجد المطبخ لازم كل يوم حاجه مش هتحسى بيه

</B></I>

الله يامادو انا معاكى بس لسه قدامى اسبوع ولاد اختى عندى لما يمشوا