نصائح وافكار توفرلك الوقت ، انا بعملها وبتفرق معاية كتير
(1) قبل ما تنزلي الشغل ، انقعي فوط المطبخ ومساكات الفرن في الحوض، اقفلي الحوض بالسدادة بتاعته ، حطي شوية مية + تايد+ كلور الوان ، وسيبيهم
ولما ترجعي من الشغل ، يا دوب بس تدعكيهم بايدك دعكة بسيطة ، حتلاقيهم زي الفل وانشريهم ، مش لازم تجمعيهم مع الغسيل ، حاجة المطبخ تتغسل على الايد احسن ، عشان تحافظي على الوانها .
(2) برضة اللبس اللي بيتغسل على الايد زي الاندر وير ، والبديهات بتاعتي ، الطرح ، وقمصان النوم اللي ما تتحطش في الغسالة ، برضة انقعيهم بنفس الخلطة اللي فاتت وسيبيهم ، او لما ترجعي من الشغل ، ولما تتدخلي تأخدي شاور اغسليهم وانت واقفة ، الموضوع كلة مش حيأخد منك عشر دقايق بالضبط ، عشان الخلطة دي بتدوب اي بقع موجودة ، ولو الغسيل ابيض ، حطي كلور ابيض ، بس البسي جونتي او كيس عشان ايدك ما تبوظش
(3) الغسالة ممكن تشغليها قبل ماتنزلي ، ولما تيجي يا دوب على التنشير بس، اذا كنتي بتخافي تشغليها قبل ما تنزلي ، يبقى املئ الغسالة من الليل ، وحطي المسحوق والكفمورت وكل حاجة ، واول ما ترجعي من الشغل شغليها على طول اول ما تدخلي .
(4)الموكيتات الصغيرة بتاعة الحمام ، وبين الاوض ، والطرقة ، اعملي نفس الخلطة اللي قلت عليها وانقعيهم فيها ، ولما ترجعي يا دوب اعمليهم بايدك بس ، حتلاقيهم زي الفل ، سيبيهم يتصفوا في الحمام شوية ، وبعدين انشريهم.
(5)فيه حاجة اسمها (بليدج) دة للتلميع ،حتلاقية بعشرة جنية ، دة بتلمعي بية الخشب ، بصراحة بيخلي البيت كلة بيبرق ، انا زي ما قلتلكم بعمل الشقة اوضة اوضة ، لحد اخر الاسبوع ، يوم الخميس بلمعها تلميع خفيف وخلاص ، وامشي المساحة الشراشيب على الحتت اللي مش عليها سجادة.
والمع الخشب بالبليدج ، بيخلي الشقة كأنها لسة معمولة دلوقتي ، وتحسي ان الخشب جديد ، وفيه منه بالروايح زي الزهور والبرتقال ، يعني لما تلمعي الشقة بيه ، تحسي انك برضة بتعطري البيت في نفس الوقت